Las preferéncias de traduccion

Un dels principis d'accion màger del Congrès per çò que pertòca la riquesa de l'occitan es promòure çò comun en respectant la diversitat, que siá inter o intravarietat. Per çò far, Revirada prepausa un sistèma per personalizar las traduccions dins lo sens francés -> occitan en foncion de las especificitats de vòstra jos-varietat : las preferéncias.

Lo sistèma de preferéncias interven en mai de la causida de la varietat de sortida del tèxte occitan. Vos permet de seleccionar, dins tota una lista de variacions de la lenga, los traits que correspondon çò melhor a la jos-varietat de l'occitan que parlatz.

Per exemple, podètz causir se la palatalizacion del grop latin -ct- se realiza en -ch- o -it-. Es a dire que los mots « nuit » et « lit » en francés se pòdon tradusir de doas faiçons en occitan lengadocian : « nuèch » e « lièch » o « nuèit » e « lièit ». Per defauta, lo motor de traduccion de Revirada produsís los mots « nuèch » e « lièch ». Mas mercés al sistèma de preferéncias, podètz precisar quala variacion desiratz utilizar e li far produsir « nuèit » e « lièit ».

Podètz atal parametrar lo traductor per que los tèxtes occitans que produsís corresponden çò melhor possible a vòstra jos-varietat. Mantun desenat de traits son ja integrats a Revirada amb per cadun mantuna opcion possibla.

Mas atencion, vos conselham d'aver ja un bon nivèl de lenga per utilizar aquel sistèma de trait. D'efièit, se fasètz una marrida combinason d'opcions, poiriatz generar de tèxtes que correspondon pas a cap de jos-varietat reala de l'occitan (amb, per exemple, una forma utilizada puslèu dins las Lanas seguida d'una forma utilizada puslèu en Bigòrra). Per poder parametrar vòstres traits, vos cal èstre capable de tornar legir lo tèxte en sortida per ne corregir las incoeréncias.